zaidi ya wanafunzi 1000 wa Kiirani wameomba kubadilisha taaluma zao kuelekea taaluma ya Fizikia na Uhandisi wa Nishati ya Nyuklia

Waziri wa Elimu, Teknolojia na Utafiti wa Iran Kamran Daneshjoo ametangaza kwamba zaidi ya wanafunzi 1000 wameomba kubadilisha taaluma zao kuelekea taaluma ya Fizikia na Uhandisi wa Nishati ya Nyuklia.

Daneshjoo amesema, wanafunzi wapatao 300 wa Chuo Kikuu cha Ufundi cha Sharif na vilevile wanafunzi zaidi ya elfu moja wa muhula wa kwanza wa masomo katika vyuo vikuu nchini wameomba kubadilisha taaluma zao ili kusomea fani ya Fizikia na Uhandisi wa Nishati ya Nyuklia.

Amesema jambo hili linaashiria kwamba mbinu za mauaji zinazofanywa na maadui dhidi ya wasomi wa Nyuklia wa Iran hazina taathira yoyote ya kuwatia woga wanafunzi hao, na kwamba mbinu hizo hazikuwasaidia lolote maadui hao.

Ameashiria kwamba kwa mujibu wa takwimu mpya zilizotolewa na mtandao wa Kielimu wa Kimataifa "Escobos" Iran imejipatia nafasi ya kwanza katika upande wa elimu, wakati ambao ilikuwa ya pili baada ya Uturuki.

Waziri huyo ameongeza kwamba idadi ya wanafunzi wa Vyuo Vikuu imefikia milioni nne huku idadi ya waliochaguliwa ikizidi pia, na amesema kwamba wakuu wa vyombo vya usalama wanafanya juhudi kubwa usiku na mchana katika kuhakikisha maisha ya wanafunzi hao yanakuwa salama kutokana na njama mbaya za maadui.

Jumuiya ya NAM yaalani hatua ya Marekani ya kukiuka anga ya Iran

Jumuiya ya Nchi Zisizofungama na Siasa za Upande Wowote NAM imelaani ukiukaji wa anga ya Iran uliofanywa na ndege ya ujasusi ya Marekani isiyo na rubani mwishoni mwa mwaka jana. Kitengo cha mawasiliano cha jumuiya ya NAM kimetoa taarifa kikilaani ukiukaji huo uliofanywa na ndege ya ujasusi ya Marekani isiyo na rubani katika anga ya Jamhuri ya Kiislamu ya Iran. Jumuiya ya Nchi Zisizofungamana na Siasa za Upande Wowote NAM ambayo ina wanachama 120 imeeleza katika taarifa yake kuwa, ukiuaji wa anga ya Iran ni kinyume na sheria zote za kimataifa zinazohusiana na mamlaka ya kujitawala ya anga za nchi mbalimbali. Mapema mwezi huu Jumuiya ya Ushirikiano wa Kiislamu OIC pia ilikemea hatua hiyo ya ndege ya ujasusi ya Marekani ya kuingia katika anga ya Iran kinyume cha sheria. Disemba 4 mwaka jana Iran ilitangaza kuwa kitengo chake cha masuala ya kielektoroniki katika vikosi vya jeshi kimefanikiwa kuidhibiti ndege hiyo ya ujasusi ya Marekani aina ya RQ-170 Sentinel ambayo ilikuwa ikipaa katika anga ya mji wa Kashmar huko kaskazini magharibi mwa Iran na baadae kuishusha chini.